Pakkio' Bunting (Versi Gowa)

Iya dende iya dende
nia tojemmi deng bunting
bunting salloa nitayang
sallowa niminasai
kukanroa ri nabbiya kupalaka ri batarayya.

Nampaki riujung boritta dg bunting ri cappa parallakkengku
naku kella kellaki guru kukellainta sunggu ri kaisilangnganga.

Naruppaiki jama’ dg bunting nabuntuliki’ agama
naku erang maki antama’ ri dallekanna tuka ballakku
nianrongia kayu bang
nicoccorangia kama’
nibaringanga doangang patampulo.

Naku panai’ tommaki poeng dg bunting
ri paladang atehaya
ni rinring pangngompo’
ni dego dego rokko’
nijajariya samiallah.

Naku paonjo’ tommaki pole dg bunting
dasere’ nijaling sujju’
nialanroi empo tahiya’
naku sungkeang tommaki pole dg bunting
pakkebbu’ nibarisallang.

Naki tulusu’mo nai mammempo dg bunting
nammempo tommo pole dg bunting
anak guru mangngajita
na’lonjo’ sulengkamo pole dg bunting
anak guru sarapatta.

Sallo salloki ammempo dg bunting
nia’ tommi daeng ngimang
niwakkelanga appa’nikka
ana’ ana’na tumakkayya
cucunna tu madinaya
tau lannyinga ri junnu’ tangkasaka ri satinja
tau assayya gau’na nitarimaya pappala’na.

Jari nakanamo sabbina kalabini malabbiritta dg bunting
lani nikkamaki’ anne dg bunting
ri dallekanna adaka
tumannappukia ada’ gallarrang tumabbicaranta.
Jari lebbakki’ ninikka dg bunting
nierang maki’ antama’
ampabattui nikkata
ri bili’ kaisilangnganga
ri kasoro’ isilang
ri pa’lungang sunduseng
ri tappere’ waistabaraking
ri timbao mata bulang pakkalli’ mata bintoeng.

Tappa kicini’mamo ilalang dg bunting
baine anrong anatta
kalabini malabbiritta
sangkontu sanrapang mami iya dg bunting
anak bidadariya naroko’ pakeang nalimpo passarimanang.

Appalampa kelommami bunting baineya nakana kelonna..
oh daeng sungguma’ anne ri itungku
te’nemi pa’maikku kugappa tommi lebanga ri minasangku..
Nakana pole kelonna bainea…
oh daeng sikatutuiki’ tope kisipakainga’ mole mole
tenamo anne parekanna maloloa..

Nakana tossing kelonna bunting bura’nea..
oh andi’ bulaennako atingku
intannako pa’maikku
belo belonako nyawaku
parammatanako matangku
manna batara andi’ malla’ ngaseng mallaggasi.

Nakana pole bunting bura’nea..
bosi timurung dinging
palate la’lakanna sunniaya gau’ ri Ali pangngssengang ri Fatimah.
Naki kanang tommo pole dg bunting
nikka bateng ma’nassana katojenganta nikanaya isilam.

Kitinro sampappa’mamo sallang dg bunting
naki sorong lima gadutta ri kananna
ti’ring dada naki buang ribarambang pa’nakkukanta sossoranta ri nabbiya.
Antemami kamma dg bunting
katurungang nampa nisanda’ labangang
nampa niolo ka tujui nabbi kipare’ oloang..

Natamparang pepe’mamo sallang dg bunting
na biseang taibani sombala’ kapasa’mamo sallang dg bunting
nasannampi bombing nataena kaeke’na linopi anging nataena galluru’na.
Na kacinikang tommo sallang dg bunting
kassi’ kebo’na madinah namammumba tommo sallang dg bunting takamangngalialia.
Kimabborong borong sarre dg bunting
ki ma’mana’ unti jawa
sembang katupa’
roliki lappa’ lappatta pinruang tujuh pintallung tassalapangngi patampulosse’re.
Nipa’lamungang tommaki’ sallang dg bunting
unti te’ne ri dallekang ballatta
kimanai’ kimanaung namate’ne pa’maitta ikatte sipammanakang.
Bunting nai’maki’ mae ri balla’na matoanta
matoang tuna ipara’ kamase mase….

SEKIAN